Zoas altied as’t mooi weer was, zat Jan Hendrik boet’n op de baanke. Leun’n op zie’n stok, zo noe en dan ‘n stroale van zich of met’n, proem’n deed e nog altied, kekke noa ‘t verkear det een eindje veerder oaver de weg roaz’n. Met ziene zesennegentig joar was hij nog good bie, mear ‘t beenwaark wil neet zo good mear met. De kraante kanne nog leazen zoonder bril en op de boerderieje, den bin’nkort a wier oavergeet noar zienne kleinzunne, geet um nog niks mis.

Jan Hendrik weet ‘t nog as de dag van gister det de K.I. van de groond kwam. De tied van de motorbolle was an e brokk’n. Hij mut nog stilkes lach’n bie de gedachte oaver die verhalen van de eerste tied. “De koo steet in de schöppe en doar is ne spieker vuur de klere”. De leu most’n ears an de gedacht’n wen’n dat ze neet mear met de koo noar de bolle hoo’m te goan. Jan Hendrik weet ‘t nog good. De eerste bolle, Mina’s Joost 9, ston bie de KI vereniging in Almelo. Det ging een zetje good, mear hier kreeg’n ze het geveul det ze an de achterste memme lean. De boer’n hier veul wat vuur een eigen vereniging, ok Jan Hendrik was doar vuur. Op eigen beene stoan. Die vereniging kwam in Hoolt’n. De eerste bolle die ze ankocht’n het’n Koen. Jan Hendrik nemt nog ne nieje proeme tabak. Het smaakt um nog good. Op de weg toetert een melkauto. Doar steed ok al ne vrömden naam op. Iets met Freeslaand. ‘t Zal wal zo mut’n. Jan Hendrik stek ziene haand op, want de chauffeur is’n vriejer van ziene kleindochter.

Ziene gedacht’n goat terugge noar de begintied van de K.I. Noar det op eigen beene stoan. Later heffe wal is edach of het wal een juuste beslissing is ewes. As hij zeet welke bol’n as ze noe gebroekt en woar ze oaveral vandan komt, krigge wal is het geveul dat ‘t better ééne had kun’n blieven. Tegenswoordig mut alles groter wod’n.

Wat is ‘t er vulle veraandert in de loop der joaren. Op zied van ‘t hoes steet noe ne groot’n ligboxenstal. In ziene begintied melk’n ze twaalf beeste, noe stoat er roem negentig. Melk’n doot ze zelf ok al neet mear. Doar heb ze een soort electrische kearls vuur. Robots neumt ze die. Hij mut toogeev’n , de beeste brengt mear op as vroger. In ziene tied was veerdoezend liter per koo völle, noe proat ze al oaver acht- tot tiendoezend liter. Och hij veendt het wal good, het et’n en dreenk’n geet er wal umme duur. Toch zol hij ‘t neet an edurfd heb’n. Zie proat noe oaver ton’n en miljoen’n zoas ze vroger oaver een dubbeltje kuier’n. Hij weet zeker dat um vroger mear van de boerderieje heur’n as ziene kleinzunne straks. ‘t Zal wal zo mut’n.

Die oole tied
Dan goat ziene gedacht’n wier noar vroger. Hij betrapt zich erop dat e dit de leste tied wal vaker dut. Neet dat die oole tied noe zo good was, mear um daj neet better wist’n red’n ie oe der met. Zo was het ok in de begintied van de K.I.

As de motorbolle kwam, had e nog effen tied um te proat’n. Doar schöt um te bin’n, de eerste motorbolle, inseminator mut e zeg’n van ziene kleindochter, was Hendrik Jan van de Kruder. Den reed de eerste tied nog op ne motor. Den had ok nog een betje verstaand van vee. Mear de motorbolle kump ok neet mear. Ziene kleinzunne heft det insemineren zelf eleerd. Doar steet noe zonne tonne met reetjes, waorin zoad zit van verschillende bol’n. Doar is al wat bie det kump oet Amerika. Van die zwarte Holsteners. Jan Hendrik is ter nog neet zo kapot van. Zie geeft ne hoop melk mear as e offe melkt beent, blif ter net völle oaver.

Jan Hendrik steet op en waandelt langzaam noar’n stal. Hij mag nog gearne eff’n noar de beeste kiek’n. Vrogger in’n stal met stro stond’n ze der wal mooier bie, mear in dis’n stal kan det neet mear, zeg ziene kleinzunne. Doar steet nog ne afstammeling van Dora. Hoevulst’n weet hij neet, wal een eind oaver de honderd. De stammoder hef hij indertied nog ekocht op de koole maark in Deventer. Toen ken’n hij alle beeste nog bie naam. Noe hebt ze allemoale een nummer. Tegenswoordig kiekt ze in’n computer en dan kunt ze alles zee’n. Wanneer as ze bollig is, wanneer asse mut kalv’n, woervulle melk asse hef egeven. Het geet um helemaole boav’n de pette.

Langzaam löppe terugge noar ziene baanke. Er is völle veraandert en doar zal nog wal völle mear veraander’n

Pas heffe nog eleaz’n dat er een keenderzesling geboor’n is. Had iets met hormonen te maak’n. Noe proat’n ze oaver kloon’n en det soort dinge. Bie de beeste beent ze ok al met embryo’s an de gange. As’t op’n doer mear in de haanne hoolt. Langzaam dommelt Jan Hendrik effen weg. Joa as…